Ieri pumiriggiu, lu Cinema De Seta ô Cantieri Culturali alla Zisa di Palermu si trasfurmò ‘n palcu di risati, mimoria e prufunnu rispettu pi dui liggenni dâ cummedia siciliana, cilibbrannu cu forza lu fattu ca la Sicilia ancora ridi grazzi a iddi. La ‘Targa Franchi e Ingrassia’, oramai ntâ terza edizzioni sutta la dirizzioni artìstica di Marco Li Vigni e pruduzzioni di l’Assuciazzioni Coram, cilibbrau cu trabbuccanti enirgìa li dui còmici ca fìciru dâ Sicilia nu centru d’ilaritati nazziunali.
La Sicilia ridi: stu cuncettu risuonau cu forza ntê palori appassiunati dî prutagunisti dâ sirata. Ivan Fiore, cchî sò scherzi e l’omaggiu musicali ê “terroni”, catturau subbitu l’atmusfera, mentri Manlio Dovì, premiatu câ “Targa alla Carriera”, cuntau cu entusiasmu lu sò ligami cu Francu e Cicciu. “Questi erano maestri che curavano la fisicità, le maschere, la professionalità al massimo“, dichiaràu, ammittennu ca si rifuggiàu ntê sò cummèdii pi evitari lu stress cutiddiànu.
La sirata, prisintata di l’istrònicu Vicenzo Canzone, vitti na succissioni d’artisti altirnati supra lu palcu chi ridìanu omaggiu a l’eredità di Franchi e Ingrassia. La Bottega Retrò, cu Cocò Gulotta e Al Di Rosa, ntirpritaru li canzuni di Franco Franchi, suttaliniannu comu sti còmici sunnu ‘nel dna’ dâ sò ginirazzioni artìstica.
Nu mumentu cummoventi fu la prisintazzioni dâ ‘Targa alla Memoria’ a Maurizio Bologna, scumparutu di picca, di parti di Nicola Tarantino dâ Sicilia Film Commission. Tarantino ricurdau li straurdinari qualità di Bologna, mentri la targa fu cugghiuta di sò mugghieri e di sò figghiu comu segnu d’omaggiu. TeleOne ricivìu na “Targa al Merito” pû sò ‘mpegnu pi diffùnniri l’arti di Franco e Ciccio ê novi ginirazzioni.
Maria Francesca Martinez Tagliavia, diriggenti dâ Galleria D’Arte Moderna di Palermo, suttaliniò la mpurtanza culturali dû duo: “Hanno un grandissimo valore per la nostra cultura, con un tipo di comicità sofisticata ed estremamente elegante che oggi si fa fatica a riconoscere” .
La Sicilia ridi, e lu fa arricurdannu dui artisti chi arrinisceru a cumunicari l’essenza cchiù prufunna di l’umurismu sicilianu. Comu riassumìu effittivamenti Ivan Fiore, “Franchi e Ingrassia sono la Sicilia, mai volgari, profondi, hanno toccato le corde del drammatico e del comico”.
La nizziativa, prumuvuta di l’Assessorato alla Cultura del Comune di Palermo, vitti puru lu ntirventu di Giuseppe Li Causi, ca parrò di curiusitati comu la criazzioni di nu francubullu didicatu ê dui còmici ntô 2022 e la dinuminazzioni di na chiazza nica darreri lu Teatro Biondo ntô 2012.
Marco Li Vigni, diritturi artìsticu, difinìu Franco e Ciccio comu “i due papà di tutti i comici siciliani”, suttaliniannu comu la sò arti sapìa fari ridiri granni e picciriddi senza mai càdiri ntâ vulgarità La Sicilia ridi, e cuntinuarà a fari accussì, grazzi a l’eredità di sti mastri dâ risata.
N’eventu ca dimustràu comu l’arti dâ cummèdia è assài cchiù di nu sèmplici intrattinimentu: è la cultura, la mimòria, l’identità. Nu tribbutu chi va assai oltri l’applausi, ma pigghia la forma di nu veru attu di ringraziamentu versu dui artisti c’hannu fattu granni la Sicilia ô munnu.
